Mangguh Suka
IBW Widiasa Kenitén
Nanak lakar
mangguh suka
Tur rawos nanaké mandi
Sidi mantra
dirgayusa
Maring rat nanak
kasumbung
Trima nanak
darma sastra
Liyang hati
Sang Arunika
menanggap.
(Gr.Mirah
Maharani,G.Bhagawan Domya:4)
Dados sisya mangda mrasidayang
mangguh suka janten nénten dangan.
Utsaha malajahang angga sanunggil nué galah. Nénten galahé malajah anggeén mapalalian kémanten sakadi
game-game sané wénten ring internété. Samaliha mangda
éling gumanti
dados sisya. Rereh pasewitraan sané becik. Galahé
sampunang anggéna ngulurin indria
sakadi inum-inuman utawi nué géng sané jagi nyengkalén kawéntenané dados sisya.
Saking pasewitraan midep jagi wetu bencana. Bencana punia ngobetin angga, krama
taler guru rupaka.
Sang sampun mikolihang dados sisya sané manut mrasidayang
pangandikané ngicénin pikenoh ring angga. Santukan
sampun madasar antuk darma sastra. Darma sastra punika unteng daging adjnanané. Kalimbakang
mangda anak lian taler prasida mikolihang kaweruhan.Pangandikané mandi mawit
saking telebé ngamargiang
darma sastra. Nénten seneng
ngandika nénten patut wau
mrasidayang jagi mandi.Sidhi mawetu saking kasidhan. Sidhiné ngawetuang
sadhu. Pamarginé punika ulengang
sang dados sisya. Uratiang pangandikan sang maangga guru pangajian, guru
rupaka. Sanghyang aji jagi sayan mapikenoh wantah ring pikayunan karuntutin
olih darma sastra. Bantang pikayunané wantah ring sastra. Sastra
kauripan sering kaucap.
Wantah sampun mabantang saking
sastra, ring jagaté pacang
kasumbung. Kasumbung nénten ngawetuang
belog ajum. Kasumbung mawit saking wikan nuturin angga.Sang kasumbung
sayan-sayan ngicénin pamargi ring
anak lian. Nénten seneng ngicénin pikobet ring
anak lian. Nénten seneng
ngobetin anak lian.Setata mautsaha rahayu.
Sisya sané becik wantah
sampun mikolihang kaweruhan prasida nglimbakang kaweruhanné. Nénten anggén ngaraga. Panglimbaké punika
mategepan pisan. Punapi malih mangkin katah genah anggén nglimbakang
kaweruhan. Sakéwanten, mangda
tetep ring anga nénten wetu ajum
utawi ngandapang anak lian antuk kaweruhan. Sanunggil manusa nué kautamaan
nganutin linggih utawi genah suang-suang.
Kaweruhan patut rereh ri kantuné nué galah. Sang katah
nué kaweruhan patut
sayan éling ring angga.
Nénten bangga
utawi andel pisan ring kaweruhan. Kaweruhanné punika ajebos magenah ring angga
wantah nénten limbakang.
Pikenoh kaweruhanné sayan nyantenang
kautamaanné wantah
sering-sering dagingin antuk pamargi patut. Kaweruhanné marupa darma
sastra gulik,resepang raris margiang.
Labels: Esai