Esai Ngudepang Meseh



Ngudepang Meseh
IBW  Widiasa Kenitén
Mula perah raga sarira,
sakit baan malendria tamah malih,
kéwala pang da manguwub,
udepang baan tapa brata,
mwang semadi trikaya sama sahisnu,
mudhita miwah karuna,
kayika satwika malih.
( I Nyoman Jegog, G. Parthayadnya:12)
            Ragadhi musuh mapara, sapunika kasurat ring Ramayana. Angga sarira gumanti genah payudan. Payudan pikayunan, laksana, utawi wacana sané ayu sareng sané nénten. Sané mrasidayang ngudepang mesehé kaucap mapikolih. Sakéwanten, seringan mesehé  ngrubéda mawinan sering sané nénten antes
kamargiang olih sang kaucap manusa raris kamargiang. Minekadi misunayang anak lian, seneng maosang kaiwangan anak lian, ngambil padruéan parajana utawi korupsi. Taler seneng ngantenang anak lian wantah manggihin pikobet. Pamarginé punika nénten antes kalaksanayang.
            Meseh patut udepang mangda sampunang sayan-sayan ngrubéda. Katah sané dados anggén sarana ngudepang sakadi tapa brata, yoga smadi, ngamargiang trikaya parisudha, mudhita, karuna sami mawit saking pikayunan satwika. Pikayunan-pikayunané puniki patut pisan uripang sanunggil rahina-wengi. Neénten ring bebaos kémanten. Mayasa kerti solah sadhu gumanti nénten jagi gelis polih phala. Sakéwanten, punapi sané margiang mawit saking kapatutan pastika pacang mapikolih. Pikolihé punika mategepan pisan rupanipuné. Sakadi kulawarga sané tentrem, arang matungkas sareng kulawarga. Sentana sané midep ngamargiang anggané dados sentana utawi mapikoih ring kauripan. Anak lian jagi ngarumasayang kawéntenané ring mracepada.
            Paripolah sadhu tan bina sakadi ngicénin téja ring angga taler téja ring anak lian rikalaning manggihin piambeng. Mrasidayang ngudepang piambeng angga, ring anak lian, punika pamargi sané luih pisan. Sang manresti gumanti mautsaha mangda mapikolih ring jagateé. Pikolihé marupa solah sadhu. Nénten paripolah sané nyemerin pamargi kamanusan.
            Pigodané janten sayan katah. Matapa sadhu karuntutin antuk tetikas kamanusan. Mabrata nénten ngucapang sané ngawetuang duleg kayun. Uleng pikayunané gumanti mawit saking tréstésan Sanghyang Widhi. Yoga smadhiné kalimbakang marupa paripolah sadhu. Yogasmadhi nénten marupa malinggih ngrastiti Sanghyang Widhi. Sané nénten kirang pikenohipun ngamargiang satitah Sanghyang Widhi. Titah Sanghyang Widhi marupa paripolah  satwika.
            Angga sarira gumanti genah mesehé ngoda kamanusan. Sakéwanten, taler wénten anggén ngudepang meseh sakadi tapa brata,yogasmadhi,trikaya parisudha, karuna, mudhita karuntutin saking pamargi satwika.

Labels: