Putihe Masawang Selem
Olih
IBW Widiasa Keniten
Adegan
I
Punggawa medal, peliatne
sakadi anak paling, inguh.
Penyeroan Punggawa
medal makta wedang:
Penyeroan :
“Saking nuni kantenang titiang Gusti Aji sakadi anak paling. Minab nue
sesepalan anyar. Utawi selingkuhan?”
Punggawa : “Apa koraang? Sesepelan? Selingkuhan?
Eda patuhanga cara anak len!”
Panyeroan :”Titiang
sampun uning dagange sane ba delog punika sira seringan ngajak malali? Mangkin
kocap sampun madaging. Sareng matungin?”( panyeroan sarwi kedek)
Punggawa (meneng)”
Tusing baan ento. Yen nganggurin saja pepes. Sakewala, tusing bani ngendah. Bli
ene suami yang baik hati. Tawang!”
Panyeroan :“Sira
ngega?”
Punggawa :”Lamun
tusing. Sing mamaksa.”
Panyeroan :”Dados
paling pisan kantene?”
Punggawa :
(ngambil wedang). “Ibi pisagane kelangan sampi. Ipoan kelangan celeng. Itelun
kelangan pipis. Ipetang dina kelangan mas-masan. Ilimang dina ada kelangan
sertifikat tanah.”
Panyeroan :”Ipun
madue antes kelangan.”
Punggawa :”Munyine
ento suba ane tusing demenin. Bli ene punggawa. Ngisiang gumi yadiastun cerik.
Dija prabelane teken parajana?”
Panyeroan :”Sampunang
bangetanga. Sane penting titiang setata polih malegan-legan sareng Gusti Aji.
Polih malancaran ka Singapura, ka Jepang. Polih indeng-indeng makta Ipad. Rekeninge
sayan madaging. Okan-okan Gusti Aji indeng-indeng makta mobil anyar. Ngujang
nika wilangin.”
Punggawa :”Stttttttttttttt!
Eda uyut-uyut. Ento nyanan dingeha. Bisa tangkep KPK. Bisa masel. Demen mesel?”
Panyeroan :”
Ten kenapi masel. Sakewanten sele mangda dados hotel. Genahin sareng kalih.”
(hihihihi).
Punggawa :”Dadi
pamimpin apang ngenah prabela. Patut tureksa teken parajana. Kenken carane
apang malinge kaejuk?”
Panyeroan :”Dangan
rerehang polisi. Titiang sareng Gusti Aji malegan-legan ring hotel.”
Punggawa :”Beneh
masi.”
Adegan 2
Polisi I :”Kaden
aluh dadi polisi. Pragat maan prentah
nangkep ane malaksana jele.”
Polisi II :”Mula
tugas iraga. Apa buin dadi bawahan. Mula setata kaprentah. Manian dadi atasan,
maan mrentah.”
Polisi III :”Aa,
yen pangkate nyak lancar. Yen tusing, patuh masi. Ane paling demenin tiang
tawang?”
Polisi I :”Nangkep
gocekan. Dor! Dor! Dor! Ketembakang mimise. Paling bebotohe mengkeb. Krepe,
taji, siap mataji, siap di krepene enu idup.”
Polisi II :”Lantas
anggon be?”
Polisi I :”Tusing.
Iraga tusing demen naar ane ulian nangkep. Lakar dadi pemangku manian.”
Polisi II lan III:”Hahahahahaha! Mesebeng dogen.”
Polisi I :”Jani
maan tugas nagkep maling. Uli maling kelas teri. Kelas gerang manyahnyah kanti
maling kelas madasi bakat itungin. Di sirah tiange pragat maling dogen ada.”
Polisi II :”Mirip
ngelah sesabukan malinge. Maan dogen mamaling. Suba ada enem bulan malinge
ngendah di tongos ideweke.”
Polisi III :”Nyampahang
polisi ne.”
Adegan 3
Somah Polisi I :”Bli
warunge celepin maling. Pipise plaibanga.”
Polisi I :”Apa
? Pipis ane mara nyilih di bank ento plaibang maling ?”
Somah Polisi I :”Saja
Bli.Kenkenang jani.Modal madagange plaibang maling.”
Polisi I :”Ene
maling maguna. Bani nyelepin umah polisi.”
Somah Polisi II :”Bli
kedise ilang.”
Polisi II :”Kedis
keker bline?”
Somah Polisi II :”Aa.”
Polisi II :”Keker
mara beli ipoan aji satu juta. Keker dedemenan bline ento.”
Somah Polisi III :”Bli
kuluke ilang.”
Polisi III :”Kuluk
pekinge ilang.”
Somah Polisi III :”Aa.”
Polisi III :”Peking
maan hadiah uli timpal leket bline.”
Polisi I,II,III Lsinarengan)”Maling
nyampahang polisi.”
Adegan 4
Rajan Maling Lkedek)”Hahahahaha!
Jani apang tawanga teken ane ngisi gumi. Ane dadi polisi. Iraga suba dadi rajan
maling. Tusing ia dogen ngelah pasukan. Iraga masi ngelah.”
Maling I :”Polisi belog. Kalahang maling.
Polisi tusing nyak malajah ngejuk maling.”
Maling II :”Aget
ngelah aji sasikep. Aji sesirep. Ada gunane anggon mamaling.”(ngedengang
sesabukane).
Maling I :”Iraga
patut liu ngelah pasukan. Yen lakar ngamalingin kantor, harus ngelah timpal di
kantor.Yen lakar ngrampok, tingal-tingalin, alih disepine.”
Maling II :”Berpikir
masi dadi maling. Tusing pajabate dogen berpikir.”(kedek).
Maling I,II
:”Bli Raja. Dueg Bli dadi rajan maling. Dija Bli malajah?”
Rajan Maling
LKedek)
Bli ngelah guru maling.Kewala suba mati.Uli cerik bli urukanga dadi maling.
Tusing ada anak nawang ia dadi maling. Dugas matine tawang?”
Maling I :”Kenken
Bli?”
Rajan Maling :”Makejang
ngelingin. Makejang madalem. Karangan bungane majejer. Misi tulisan Turut
Berbela Sungkawa. Ia maling mengkeb. Nyemak pipis kewala pipise ento anggona
nulungin timpal. Buina tawang?”
Maling II :”Tusing?”
Rajan Maling :”Sebengne
alep,pangus ngomongne pragat masi ane luung-luung. Tusing dadi nyakitin anak
len. Tusing dadi mamaling. Mamaling ento jele pesan. Tusing lakar maan suargan.
Tusing ada ane nawang ia celema paling coraha.”
Maling I :”Nika
luungne yen kulitne di sisi luung di tengah mabikas maling.”
Maling II :”Tiang meled cara gurun Bli.”
Maling I,II, :”Tiang masi.”
Rajan Maling : “Hahahahahaha! Makejang meled dadi maling
masebeng suci. “
Maling I,II :”Mai mamaling. Apang sayan paling
polisine keto masi pemimpine.”
Rajan Maling :”Bli majalan malunan. Cai malingse dadi gegendong.”
Maling I,II :”Mula
dueg Bli Raja.”
Adegan 5
Telik Tanem
Polis i:”Ada maling. Kelompokne I
Raja.Enggalang juk. “
Polisi :”Nah!”
Rajan Maling :”Melah-melah liu telik tanem jani.
Yen ada ane katangkep tusing dadi ngaku. Apa buin ngorahang Bli dadi
pamimpinne.”
Polisi :”Tembak!Ento Klompokne I Raja.”
Maling I,II :”Mlaib!Mlaib!Mlaiiiiiiiiiiiiiiiiiib!”
Polisi :”Kepuuuuuuuuuung. Tembak batisne!
Dor!Dor!Dor!”
Polisi :”Lakar kija buin malaib?”
Maling I,II :”Tiang nunas urip.”
Polisi :”I Rajakija?”
Maling I,II :”Nenten uningin.Tiang nenten uning
ring Rajan Maling.”
Polisi :”Meled
mukum ajebos apa makelo. Yen meled ajebos, orahang nyen gurun ibane.”
Maling I,II Lsaling
kipekin)”Bli Raja.”
Polisi “Man dija jani?”
Maling I,II :”Ten uningin. “
Polisi :”Dasar maling.”
Polisi I :“Mamaling ento tusing luung. Tusing
ada ane menehang. Idup acepok eda dadianga deweke maling.”
Polisi II :”Man, apa ane ngrananyang mamaling?”
Maling I :”Puniki” ( matujuhang basang).
Polisi I :”Ulian basang dadi maling.Yen keto,
magae deweke. Eda lengit magae. Masak kalahangan teken anak uli durapulina ?
Ngadep soto teken bakso dogen nyidayang meli gumi di Bali. Jengahang deweke.”
Maling II :”Ampun
kenyel makarya. Wantah sapunika, jagi ngadol soto sareng bakso. Pak polisi
ngamodalin! Nggih ? “
Polisi II :”Yen nyak tusing buin dadi maling,
nyak ngamodalin.”
Maling I :”Setuju.”
Polisi I : Nanging keto,tulungin masi apang
Rajan Malinge bakat ejuk.”
Maling II
:”Dangan. Ngejuk maling harus nawang ilmun maling. Pak polisi kursus dumun
serang tiang.”
PolisiII :”Ngendah dogen.Jani bersihin malu
WC-ne!”
Maling I,II :”Beh
kaden maan nasi bungkus. Saget maan mersihin WC.”
Polisi :”Lamun tusing nyak, ene ngenen .”(
ngedengang gemelan).
Maling I,II :
Sampunang galak-galak, Bapak Polisi. Elingang modale!”
Adegan
6
Polisine molihang gatra ring surat
kabare wenten kamalingan malih. Sane
kicalan Gusti Aji.
Polisi I :” Mara suud ngejuk maling.Dadi buin
teka malinge. Mirib ngelah sebun maling? Sinah Rajan malinge baan tusing
katangkep? Ene suba ane ngranayang.
Gusti Aj i :”Pak Polisi. Kenken ene gumine dadi
ebekin maling. Tiang ane ngisiang gumi masi celepin maling. Polisine ngujang
dogen gegaene? Polisi tidur kenken?”
Polisi II :”Gusti
Aji, wau dibi tiang ngejuk maling. Mangkin malih wenten maling. Minab akeh
panyamaan ipune?”
Gusti Aji :”Tiang
tusing nakonang panyamaan maling. Tiang ngalih apang malinge majuk. Yen perlu
tenungang! Jengah tiang. Tiang ngisi gumi tusing nyidayang ngamanang di umah
tiange. Gigis jengah tiange dadi pamimpin. Tiang ene pamimpin! Tusing jelema
aji aketeng!”
Polisi
:”Gusti Aji mantuk dumun. Tiang jagi mautsaha ngejuk malinge.”
Gusti Aji
:”Eda misi jagi. Juk malinge! Yen misi jagi, kayang buin abulan tusing majuk.
Tiang mulih!”
Polisi
:”Rarisang!”
Polisi II :”Kenken
yen tenungang? Sina ada swecan Widhi malinge bakat enggal ejuk.”
Polisi I :”Tiang
sumakuta. Jani dabdabang. Nanging ajak masi malinge ene. Sinah ia nawang kenken
keneh malinge.”
Polisi I :”Beneh
masi.”
Polisi II :”Bareng ka tukang tenunge?”
Maling I :”Jagi
ngujang?”
Polisi II :”Nenungin
maling.”
Maling I :”Aget masi malinge katenungin. Tusing anak paling ngalih kawitan
dogen ka tunang tenunge.Hahahahahaha !”( kedek).
Polisi II :”Eda
kedek. Bareng apa tusing?”
Maling I :”Inggih
sareng.”
Adegan 6
Ring paumahan tukang tenunge
Polisi :”
Swastiastu.”
Tukang Tenung :”Swastiastu, rarisang ngranjing!” (
medal). “Yee, Bapak Polisi, nembe wenten pisarat pisan ?”
Polisi
:”Tiang nunas tulung.”
Tukang Tenung :”Tiang
sampun uning.pasti indik kicalan?”
Polisi :”Yukti
pisan.Dados uningin?”
Tukang Tenung :”Sampunang
ampah tiang tukang tenung. Nika mantas nenungin maling sane kantun mangkihan.
Nenungin kawitan sane sampun dija kapa ngayah napi di suarga napi ring neraka
dangan antuk tiang. Sane demenin tiang uningin?”
Polisi :”
Nenten!”
Tukang Tenung :”Nenungin
sapasira sane jagi dados pamimpin.Nenungin sane meled dados anggota dewan. Akeh
sampun makta rarapan. Pinih nenten amplop. Hahahaha!” (kedek)
Polisi :”Ampura
titiang nenten makta amplop.”
Tukang tenung :”Sampun
uningin. Kantong Bapake tipis. Montor bapake roda dua.Anggen tiang mayadnya
niki.”
Polisi :”Suksma
wantah sapunika.”
Tukang Tenung :”Ambil
jebos dupane punika.Malih jebos manten kanten sane mamaling.”
Polisi :
“Inggih.Akuda nyit titiang?”
Tukang Tenung :”Tetiga
manten.” (Tukang Tenung mamantra)
“Ratu
Bhathara saking Sabang kantos Merauke. Saking kutub utara kantos kutub selatan.
Saking benoa Asia,Afrika, Amerika,Australia. Eropa.Ring dija Bhathara malinggih
rauh mriki. Titiang nunas ring singgih Bhathara sapa sira sane mamandung ring
Gusti Ajine? Tedun singgih Bhathara. Tedun! Titiang nglungsur pangandika.”
Maling :”Dadi
cara munyine Beli Raja ene? Mirib ia ane suba maganti laksana. Suba suci jani?”
Tukang Tenung :”
Ane mamaling. Cirine mabok lantang. Kulitne sada gading. Umahne paak teken
gusti Aji.”
Polisi :”Suksma
Jro. Benjang jagi tureksain titiang. Titiang mapamit. Ampura nenten makta amplop.
Wantah sampun katangkep jagi aturin titiang samatra.”
Tukang Tenung :”Sampunang.
Anggen tiang mayadnya.”
Maling :”Pak Polisi. Dados kadi Beli Raja
punika?”
Polisi :”Eda ngendah. Ento Tukang Tenung suba
dadi anak ening. Tingalin bajune kambenne suba mamutih. Sinah suba paak teken
Widhi.”
Maling :”Sira
uning. Malingse dados anak suci Beli Raja?”
Polisi :”Liunan
itungan.Mai mulih!”
Maling :”Tiang
sangsaya ring Tukang Tenunge.”
Polisi :”Dadi
curiga. Tusing dadi nuduh!”
Maling :”Inggih.”
Polisi :”Buin
jebos ajaka ngintip ane orahanga teken tukang tenunge.”
Maling :”Inggih.”
Adegan
7
Polisi ngintip sane kanikaang olih Tukang Tenunge.
Maling :”Puniki
umah timpal leketne Beli Raja, Pak
Polisi.”
Polisi :”Yen
saja keto, sinah buin jebos teka. Melahang mengkeb apang tusing tawanga.”
Maling :”Inggih.”
Rajan Maling :”Jalan
jani buin celepin umahne Gusti Aji!”
Polisi :”Dadi cara munyin tukang tenunge
ituni?”
Rajan Maling :”Apang paling polisine ngejuk
maling.”
Maling :”Niki jati-jati suaran Beli
Raja.Ngiring ejuk.”
Polisi :”Antiang malu apang pesu.”
Rajan Maling medal.
Maling :”Maliiiiiiiiiiiiiiiiiiiiiiiiiiiiiing!
Maliiiiiiiiiiiiiiiiiiiiiiiiiiiing!”
Polisi :”Eda malaib.(Nandalang pistol). ”Yeeeeeeeeeeeeee! Puniki tukang tenunge sane
nuni. Dados usan mabusana putih?
Maling :”Puniki sampun rajan malinge. Ipun
mabusana putih sakewanten rajan maling.”
Polisi :”
Badah ! Ene madan maling teriak maling.
Malinge nangkep maling.”
Puput.
NGALIH MATAN AI
(Luh Ayu negak di bale daja)
Labels: Drama Bali Modern