Geguritan
Asram Madya Pratama Sadutama :
Swadarmaning
Sisia – Guru
Dados sisia patut éling
ring swadarma. Dados sisia patut malajahang angga kantos molihang kawiadnyanan.
Dados sisia subakti utawi ngamargiang tata titiné ring sekolah. Ngranjing gumanti ngrereh ajah-ajah. Dohin pisan
paripolahé sané nyengkalén kauripané
kawekas. Minekadi, miyegan, kebut-kebutan, nglanjar utawi nganggén narkoba. Paripolahé tan anut
punika midep nyengkalén utawi mikobetin guru rupaka, guru pangajian , guru wisésa.
Sang maangga guru rupaka janten pisan ngastitiang mangda putrané dados sisia
utama, sadhu utama, dados tatuladan,
midep makta angga.
Wantah sampun dados
sisia sadhu utama , sekolah, guru, guru rupaka, guru wisésa jagi angayubagia. Generasi sané jagi ngentosin sampun sayan becik.
Sapunika taler
dados guru, mangda setata éling ring
swadarmaning dados guru. Ngicén kaadnyanan, katerampilan, utawi tatatiti sané
patut. Guru dados tatuladan majengé ring sisia. Guru mangda setata malajahang
angga. Guru pradnyan sisiané janten pacang sayan nyenengin . Guru taler urati
ring sisia, ring sekolah ring wewidangan sekolah. Sekolahé mangda asri, temtrem
ngwetuang genah malajah sané becik. Para guru adung sareng manggala ring sekolah, sareng komité, sareng pegawai, sareng panjaga
sekolah. Sapunika I Madé Suarsa nyurat ring Geguritan Asram Madya Pratama
Sadutama, kamedalang olih Sekaa Santi Smara Ratih SMP Negeri VI Dénpasar.
Geguritan puniki kawangun
antuk pupuh sinom 14 pada, ginada 7 pada, dandang apada, durma 9 pada, maskumambang
8 pada, pangkur apada. Wenten 40 pada.
Wetu ring mrecepada
manados manusia kaicénin tri premana, sabda, bayu, idep. Kautamaan manusa nué
idep yang sahihang ring satwa. Yan sahing ring taru, kalangkungan manusané nué
sabda, idep. Madué tri premana patut anggén ngulik tatwa, tutur, serana bekel
ring kauripané. Tri premanané sané kantun nyanyap anggén ngupira angga, anggén
ngrebut kawikanan, anggén ngiyasaang angga ring negara jagi ngentosin riwekas :
Réhning méweh dados jadma/ tri premanané
mamurti/ bilih – bilih para sisia/ tatwa tutur
gulik sai/ pacang dados tabeng gumi/ ngupapira mangda kukuh/ déwa jaga
ngawisésa/ réh panata sayan lingsir/ sida suluk/ dharma agama negara// (
Puh Sinom 12, kaca 12).
Dados guru taler
mangda seleg ngajahin, seleg malajah mangda wibawané nénten surud. Wibawané antuk urati ring sisia, ngemong sisia mangda
dados sisia sadhu utama :
Guru patut micayang/ tetuladan ring i murid/ kalaning ngemban swadarma/ malajah
taler ngajahin/ pangrawuhé mangda rajin/ wibawané tatan surud/ sareng – sareng
manyaratang/ tan bina kadi mangukir/ paras ayu/ mangripta arca utama// (
Puh Sinom 13, kaca 13).
Sisia - guru mangda
matunggalan. Sami mangda seleg ngranjing. Sisiané seleg malajah. Para guru seleg ngajahin. Ngicénin tatwa, bhasa bhasita,
tatatiti anggah ungguh kamanusan, budaya,
seni :
Gegancangan/ guruné maajah – ajah/ nénten
wénten ngléwa lekig/ ngicén paplajahan/ kawruhan lan kasujanan/ kamanusan jagat
pasti/ katekan bhasa/ tatwa budaya lan seni// ( Puh Durma 2, kaca 20).
Swadarmaning dados
sisia – guru patut élingang. Sisia – guru mangda sami – sami pradnyan. IBW
Widiasa Kenitén
Labels: Geguritan