Gema Sastra Kita: Geguritan Bhagawan Domya : Bhakti ring Guru

Mangda polih panugrahan saking sang maangga guru janten nénten dangan. Punapi malih panugrahan mangda dados wiku. Janten pisan sang maangga guru nabé pacang mratiaksaang sekala-niskala. Sanghyang Siwa Sasana, Wretti Sasana, Tingkahing Maguru Bhakti patut pisan telebang kalih margiang.

Sang maangga sisia taler mautsaha ngamargiang satitah, piteket-piteket saking guru nabé. Guru nabé taler mautsaha mangda sisiané nénten lémpas saking pamargi paguron-guron. Sisia patut pisan sering-sering nglungsur pangandikan saking guru nabé. Punapi malih rikalaning wénten sané durung kapikayun, sang guru nabé patut tunasin.

Imba sané pinih becik sakadi Bhagawan Domya nuréksain sisiané. Sapunika kababahang ring Geguritan Bhagawan Domya sané kakawi olih Gr. Mirah Maharani.Geguritan punika katah madaging pupuh, minekadi, sinom,ginada, pangkur, dandang, durma, adri, ginanti, jerum, semarandana, sadpada ngisep sekar, pucung, maskumambang, wasi, megatruh, gambuh, girisa, demung, mijil, tikus kapanting, layon sari, rarawangi, tunjung biru. Wénten 123 pada.

Satunggil sisia katuréksain manut sakadi tingkahing maguru bhakti. Sang maangga sisia taler satinut sapangandikan sang maangga guru nabé. Nénten purun tempal. Sang Arunika kanikain mangda satata subhakti ring ibu pretiwi. Saking carik jagi presida amerthané medal. Tulénga ring carik mangda cariké tetep rajeg . Subhatiné nekeng twas ring nabé , janten pisan Sanghyang Sastra kapikolihang :

Nanak lakar mangguh suka/ tur rawos nanaké mandi/ sidi mantra dirga yusa/ maring rat nanak darma sastra/ liyang ati/ Sang Arunika mananggap// ( Pupuh Ginada 4, kaca 4).

Dados sisia nénten dados loba. Wantah pikayunan loba metu, sanghyang Sastra pacang ngedohin. Nénten dados ngambil rayunan nabé. Imba punika ring Sang Utamaniu .Kanikain nuréksain lembu . Saking lembu ngamedalang susu. Susu pinaka amertha. Mecikang lembu pateh ring astiti bhakti ring Sanghyang Raré Angon .Saking subhatiné kaicén panugrahan Sanghyang Aswino :

Nudut kayun/ Sang Bhagahawan lintang asung/ raris ngicén lugraha/ mantra aswino Déwa luwih/ twi kasumbung/ pinaka tamba sang lara// ( Pupuh Pucung 2, kaca 13).

Sang Wédha bhaktiné ring guru taler pateh. Nénten purun ngriinin ngajeng sadurungé nabéné. Sapunika taler, nénten purun ngriinin wantah sareng-sareng majengan. Saking ajengan, Amerthané rauh, nénten bina sakadi ngiring Bhathari Sri :

Malarapan baktin ida/ sareng ngiring panes etis/ mantuk ring ida Bhagawan/ Sang Bhagawan lintang asih/ sang Wédha lintang astiti/ yatna sakancan pituduh/ awanan kicén lugraha/ makudang-kudang sastra aji/ pangeweruh/ miwah wéda mantra utama// ( Pupuh Sinom 2, kaca 15).

Bhakti ring guru patut kadasarin antuk pikayuan nekéng twas. Subhakti ring guru pacang polih panugrahan sané gumanti manut ring sisia. Sang maangga guru wikan ring kaluihan utawi agem-ageman sané patut utawi manut kagamel antuk sisia. Sang maangga sisia patut pisan ngamong panugrahané. Ngamong panugrahané pateh sakadi ngamargiang sapituduh guru. Sapituduh guru pinaka seraya kanti ngruruh jagat sunia. Jagat sunia gumanti acep-acepan sang maguru sastra.